Sumqayıtda qanunsuz obyektə qarşı sahibkar maraqlı həll yolu tapıb - FOTOLAR
Sumqayıt şəhəri şəhərsalma qanunları ilə götürsək, çox gözəl salınıb. Amma görünən odur ki, son illər şəhərin gözəlliyi itirilmək üzrədi. Vaxtilə geniş küçələri, səkiləri, binaları olan bu şəhər tədricən eybəcər və əsəbləri pozan bir hala gətirilir. Ələlxüsus kütləvi istifadə olunan küçələr var ki, orada hərəkət etmək üçün heç 1 metr də yer yoxdu. Sonra da məcbur qalıb maşın yolu ilə hərəkət edən insanlara qarşı reyd keçirilir ki, yoldan düzgün istifadə etmirsiz. Səki olmayandan sonra vətəndaşlar məcbur qalıb avtomobil yolu ilə hərəkət etməsin, neyləsin? Hər halda, insanların qanadı yoxdur ki, hava yolu ilə hərəkət etsin.
Xatırlayırsızsa, bir müddət öncə Sumqayit.tv olaraq Sülh küçəsində səkiyə qoyulmuş qanunsuz obyektin şəklini sizə təqdim etmişdik. Artıq 1 ilə yaxındı nə problem həll olunur, nə də obyekt aktiv gediş-gəliş olan yerdən yığışdırılır. Problemlə bağlı müxtəlif instansiyalara müraciət olunsa da, müsbət nəticə yoxdu. Yaxınlıqda yerləşən komputer mağazası isə problemdən maraqlı çıxış yolu tapıb. Belə ki mağaza sahibi öz reklam lövhəsini məhz qanunsuz qoyulan obyektin hər iki tərəfinə yapışdırıb. O, bu addımını qanunsuz obyektə qarşı heç bir tədbir görülmədiyinə görə, məcbur qalıb etdiyini bildirib.
19-11-2022, 16:05
1 466
