Sumqayıt sakini yaşadığı ərazidə yerləşən məktəbin ətrafında xeyriyyə məqsədli işlər görür.
Sumqayit.tv əməkdaşının verdiyi məlumata görə, axşam  saatlarında, Sumqayıtda yerləşən Məhəmməd Füzuli adına 15 saylı tam orta məktəbin ətrafında abadlıq işləri aparılır. Belə ki, məktəbin giriş qapılarına maşınların yaxınlaşa bilməməsi üçün dəmirlər basdırılıb, piyada keçid zolaqları çəkilir. Bir neçə gün öncə isə ətraf evlərdən gələn şagird və valideynlərin rahat keçid etməsi üçün, məktəbin hasarında yeni, köməkçi giriş qapısı açılıb. Qapının girişində isə 2 ədəd ağac əkilib. 
Bu xeyirxah əməlin sahibi ilə ayaqüstü qısa  söhbətimiz zamanı o "biz vətəndaşlar şəhər sakinlərinin rahatlığı üçün quruculuq işlərinə  biganə qalmamalıyıq.  Hər kəs imkan daxilində qurub-yaratmalı,  ərsəyə gətirilən işə cəmiyyət olaraq bizlər sahib olmalıyıq. Bu dövlət bizimdir axı" deyərək fikirlərini bildirdi. 
Qeyd edək ki, sözügedən məktəbin ətrafında təqdir olunası işləri həyata keçirən,  nə aidiyyatı dövlət qurumudur, nə də hər hansısa bir şirkət.  Adının hallanmasını istəməyən bu xeyirli işin təşəbbüskarı və icraçısı elə həmin ərazinin sakinidir.

Müəllif: Sumqayit.tv