"Rafiqi sonuncu dəfə 1992-ci il yanvar ayının 23-də Sumqayıtda görmüşəm. İkimiz birgə şəhər avtovağzalına gəldik. Yenə cəbhəyə getmək istəyirdi. Həmin gün gedə bilmədi. Səhəri gün qonşumuzun avtomobili ilə Bakıya yola düşdü və oradan da Qarabağa getdi. Sonra bildik ki, Tofiq Daşaltı əməliyyatında iştirak edib və şəhid olub".   

Bu sözləri Bizim.Media-ya Daşaltı əməliyyatında şəhid olduğu bildirilən Rafiq Ağayevin qardaşı, Sumqayıt şəhər sakini Tofiq Ağayev deyib. 

O, məlumat verib ki, qardaşı 7 iyul 1966-cı ildə anadan olub. Əslən Qubanın Cimi kəndindən olan ailə Sumqayıt şəhərində yaşayıb.   


Rafiq Qarabağa könüllü gedən yüzlərlə igid qəhrəmanlarımızdandır: 1984-1986-cı ildə Orenburqda hərbi xidmətdə olub. Qayıdandan sonra Sumqayıtın Boru Prokat Zavodunda işləyib. Birinci Qarabağ Müharibəsi başlayanda Şıxov batalyonunun tərkibində Qarabağa könüllü gedib. 1992-ci il yanvar ayının əvvəllərində Kərcicahan istiqamətində gedən döyüşlərə qatılıb. Oradan qayıdandan bir neçə gün sonra Daşaltıya yola düşüb.   

Tofiq Ağayevin sözlərinə görə, Daşaltı əməliyyatından sonra qardaşı Rafiqin orada şəhid olması xəbərini alıb: 

"Yanvarın 25-26 da keçirilən uğursuz Daşaltı əməliyyatından sonra mən Bakıya gedib Şıxov batalyonunun hərbçiləri ilə görüşdüm. Hamı bir nəfər kimi mənə Rafiqin yaralanan yoldaşını xilas etmək istəyərkən qarnından yaralandığı, əsir düşməmək üçün özünü qumbara ilə partlatdığı məlumatını verdilər".


Tofiq Ağayev bildirib ki, qardaşının Daşaltı əməliyyatında şəhid olduğu rəsmi şəkildə təsdiqlənmədiyindən Rafiq itkin kimi qeydə alınıb, şəhid statusu verilib. Amma bu günəcən Rafiqin məzarının harada olması və ya sümüklərinin qalığının tapılması barədə məlumatları yoxdur.  
 
Ailənin 31 ildir gözləri yollardan yığılmır 

Son vaxtlar Birinci Qarabağ Müharibəsində itkin düşmüş şəhidlərimizin qalıqlarının tanınıb doğulduqları məkanlarda dəfn edilməsini çox təqdirəlayiq hesab edən Tofiq Ağayev, bir gün qardaşı Rafiqlə bağlı da rəsmi xəbər alacağına ümid edir. 


Deyir ki, anam Zeynəb ölən günəcən Rafiqdən xəbər gözlədi. Biz hələ 2015-ci ildə DNT analizi vermişik. İnanıram ki, bizim Rafiqin nəşinin qalıqları da tapılacaq, onda valideynlərimizin də ruhu şad olar, Rafiqin də.