Artıq neçə illərdir ki, Sumqayıt sakinləri nəqliyyat problemindən əziyyət çəkirlər.  
Bu dəfə də şəhər sakinləri Sumqayit.tv-in elektron ünvanına növbəti şikayət yönümlü  müraciət ünvanlayıblar. Onlar əsasən 2,5,30,12A və 33 nömrəli marşrutların yarıtmaz fəaliyyətindən gileyləniblər.
Narazı sakinlər sözügedən marşurut xətti üzrə işləyən avtobusların gec-gec gəlməsindən və ara məsafəsinin uzun olması səbəbindən, sərnişin sıxlığının meydana gəlmə problemindən  şikayətləniblər.  
Məsələyə  ilə bağlı Sumqayit.tv-in sorğusuna AYNA-nın mətbuat katibi Tural Orucov yazılı açıqlama göndərib.  
T.Orucovun açıqlamasını olduğu kimi dərc edirik:
“Sumqayıt şəhərdaxili 2 və 5 nömrəli müntəzəm marşrut xəttinin hər birində gündəlik 6 avtobus 18 dəqiqəlik intervalla fəaliyyət göstərir. 12A nömrəli xəttə 4 nəqliyyat vasitəsi 20 dəqiqə intervalla, 30 nömrəli xəttə 4 avtobus 25 dəqiqə intervalla, 33 nömrəli xəttə isə 11 nəqliyyat vasitəsi 10 dəqiqə intervalla sərnişinlərə xidmət göstərir. Qeyd edək ki, Sumqayıt şəhərində avtobus parkının təhlili aparılıb. Avtobus parkında saz vəziyyətdə olan nəqliyyat vasitələrin azlığı səbəbindən marşrut xətlərində kifayət qədər avtobus istifadə olunmur. Bu da intervalların böyüməsinə gətirib çıxarır.   Daşıyıcıya xətt üzrə avtobusların sayının artırılması və marşrutun nizamlı fəaliyyətinin təmin edilməsi barədə tapşırıq verilib."- deyə, o məsələyə münasibətini bildirib.
Müəllif: Vəsiqə Dadaşova