Sumqayıt şəhər İcra Hakimiyyətinin başçısı Zakir Fərəcov şəhər ictimaiyyətinin nümayəndələri ilə görüşüb.
Tədbirdə Sumqayıt şəhərinin ictimai-siyasi, sosial-iqtisadi və mədəni həyatında xidmətlərinə görə Prezident İlham Əliyev tərəfindən təltif edilmiş şəxslərə orden və medallar təqdim olunub.
Sumqayıt Dövlət Dram Teatrında keçirilən tədbirdə şəhərin ictimai-siyasi həyatında fərqlənən şəxslərə Sumqayıt Şəhər İcra Hakimiyyətinin Fəxri Fərmanları da təqdim olunub.
Mərasimdə çıxış edən Zakir Fərəcov tədbir iştirakçılarını Dünya Azərbaycanlılarının Həmrəylik Günü və Yeni il münasibətilə təbrik edib. Prezident İlham Əliyevin rəhbərliyi ilə Azərbaycanda davamlı tərəqqinin təmin edildiyini deyən şəhər rəhbəri 2024-cü ilin Sumqayıt şəhəri üçün uğurlu il olduğunu qeyd edib. Azərbaycanın inkişafını simvolizə edən, özünəməxsus müasir şəhər nümunəsinə çevrilən 75 yaşlı Sumqayıt öz tarixinin  çox fərəhli, yaddaşlara əbədi həkk olunan yeni günlərini yaşayır. Son illər həyata keçirilən geniş miqyaslı, uğurlu layihələr şəhərin simasını tamamilə dəyişib. Bu gün Sumqayıt müasir, böyük sənaye potensialına malik olan, gözəlliyi ilə öndə gedən şəhərlərə meydan oxuyan, sürətlə inkişaf edən, gündən – günə abadlaşan bir şəhərdir.
Mərasimdə çıxış edən digər natiqlər də tədbir iştirakçılarına təbriklərini çatdırıblar. Onlar şəhərin inkişafında iştirak etdikləri üçün qürur hissi keçirdiklərini bildirərək, təltiflərə görə Prezident İlham Əliyevə minnətdarlıqlarını ifadə ediblər. Qeyd edilib ki, dövlət başçısının diqqət və qayğısı nəticəsində Sumqayıtın uğurları daha da artacaq.
Tədbir iştirakçıları həmçinin Sumqayıtın Azərbaycanın sosial-iqtisadi və mədəni inkişafında mühüm rola malik olduğunu vurğulayıblar. Şəhərin 75 illik yubileyi münasibətilə həyata keçirilən layihələrin Sumqayıtı daha müasir, daha abad bir şəhərə çevirdiyini qeyd edərək, gələcəkdə bu inkişafın davam edəcəyinə əminlik ifadə  olunub.