Sumqayıtın bu ərazisində yaşayan sakinləri qazın olmamasından şikayətlənirlər… 
Sumqayit.tv-yə daxil olan şikayətdə bildirilir ki, Sumqayıt şəhər,Yaşıl Dərə ərazisində yerləşən Metallurq bağları, 9 və 7-ci sahənin ərazisində yaşayan sakinlər üç gündür ki, qazın təzyiqinin aşağı olması səbəbindən soyuqdan donurlar. 
Şikayətçi, Qarabağ qazisi, Azərbaycan Respublikasının Vitse-Prezidenti Mehriban xanım Əliyevanın birbaşa nəzarətində olan, onkoloji xəstə Vəliyev Vəli Nuruş oğlu redaksiyamıza bildirib ki, soyuq qış aylarında neft-qaz ölkəsində bizim evlərə maye qazın demək olar ki, verilməməsi heç bir məntiqə sığmır. 
“Axı bizim dövlət dünyaya neft-qaz ixrac edən ölkədir. Necə ola bilər ki, dünyaya qaz satan ölkənin Metallurq ərazisində yaşayan sakinləri bu gün qazdan əziyyət çəksin?  Məsələ ilə bağlı ərazidə yaşayan bir qurub sakin 7 və 9-cu sahə üzrə qaz təchizatına baxan Elşən adlı məsul şəxslə görüşsəkdə problem öz həllini tapmadı. Bu üç gün ərzində dəfələrlə  Sumqayıt Qaz İstismar İdarəsinin daxili telefonları və qaynar xətti ilə əlaqə saxlamağa çalışsaqda, zəngimizə cavab verən şəxs tapmadıq. Hətta, yerində olmayan Sumqayıt Qaz İstismar İdarəsinin işçiləri üzündən, biz sakinlər yığışıb yolu kəsmək istədik. Lakin, atacağımız addımın dövlətimiz üçün başucalığı gətirməyəcəyini düşünərək fikirimizdən daşındıq. Nəhayət, çarəsiz qalıb Prezident aparatı ilə əlaqə saxlayaraq, məsələ barədə məlumat verdik. Prezident aparatına edsilən zəngimizdən sonra telefonlarımıza cavab verməyən Sumqayıt Qaz İstismar İdarəsindən bizə zəng edib bildirdilər ki, narahat olmayın məsələ öz həllini tapacaq. Lakin, hələ də qazın təchizatı artırılmayıb”. - deyə, V.Vəliyev bildirib.
Ümumiyyətlə, son zamanlar Sumqayıtın bir sıra ərazilərində vətəndaşlar qazın təzyiqi ilə bağlı narazılıq edir. 
Məsələ ilə bağlı Sumqayıt Qaz İstismar İdarəsi ilə əlaqə saxlamağa çalışsaqda, zənglərimiz cavabsız qaldı.