Milli Məclisin deputatı Elnarə Akimova 2023-cü il 19 sentyabr tarixində Azərbaycan Silahlı Qüvvələri tərəfindən keçirilmiş lokal antiterror tədbirləri zamanı şəhid olmuş baş leytenant Mirzəyev Cavid Azər oğlunun ailəsini ziyarət edib.

Sumqayit.tv xəbər verir ki, ziyarət zamanı deputat şəhidin ailə üzvləri ilə görüşərək onların yaşayış şəraiti, gündəlik çətinlikləri və mövcud ehtiyacları ilə maraqlanıb. Elnarə Akimova qeyd edib ki, şəhid ailələrinə dövlət tərəfindən göstərilən diqqət və qayğı davamlı xarakter daşıyır və bu istiqamətdə sosial dəstək tədbirləri mərhələli şəkildə həyata keçirilir.

Deputat, eyni zamanda, Vətən uğrunda həyatını itirən hər bir şəhidin xatirəsinin daim ehtiramla anıldığını, onların ailələrinə qayğı göstərilməsinin isə cəmiyyətin mənəvi borcu olduğunu vurğulayıb.

Görüş zamanı şəhidin xidməti fəaliyyəti barədə məlumat verilib, onun xatirəsi ehtiramla yad olunub.