İyunun son günləri yaşansa da, Sumqayıtda bir sıra marşrut avtobuslarında kondisioner sistemlərinin işləməməsi ilə bağlı sakinlərin narazılığı davam edir.

Sumqayit.tv-in elektron ünvanına daxil olan şikayətdə vətəndaşlar bildirirlər ki, şəhərdə fəaliyyət göstərən bəzi marşrut xətlərində yeni nəsil avtobusların tətbiqinə baxmayaraq, sərnişindaşıma şəraitində ciddi irəliləyiş hiss olunmur.

Sakinlərin sözlərinə görə, 17 və 18 saylı köhnə “PAZ” avtobuslarından tutmuş, müasir “AKİA” markalı nəqliyyat vasitələrinə qədər demək olar ki, kondisioner sistemi ya mövcud deyil, ya da qəsdən işlədilmir. Onlar əlavə edirlər ki, temperatur 30 dərəcəni keçdiyi, sıxlıq artdığı hallarda belə, avtobusların içərisində dözülməz vəziyyət yaranır.

“Kondisionerlər ya nasazdır, ya da sürücülər enerji sərfiyyatına görə onları qoşmaq istəmirlər. Bu da günün pik saatlarında sərnişinlər üçün ciddi narahatlıq yaradır,” – deyə şikayətçilər bildirirlər.

Mütəxəssislər qeyd edirlər ki, ictimai nəqliyyatda havalandırma və soyutma sistemlərinin olmaması təkcə komfort məsələsi deyil, həm də sərnişinlərin sağlamlığı üçün risk faktorudur – xüsusilə yaşlı insanlar və uşaqlar üçün.

Hazırda məsələ ilə bağlı aidiyyəti qurumların rəsmi mövqeyi açıqlanmayıb. Sakinlər isə problemin yay ayları boyunca davam etməsindən narahat olduqlarını və nəqliyyat orqanlarından operativ reaksiya gözlədiklərini bildirirlər.

27-06-2025, 12:10 250