Sumqayıt şəhəri, Metallurq bağları 9-cu sahədə – 39 nömrəli marşrutun son dayanacağından təxminən 400 metr aralıda qazılmış sahibsiz quyular ərazidə yaşayan sakinlərin ciddi narahatlığına səbəb olub.

Sakinlərin Sumqayit.tv redaksiyasına verdiyi məlumata görə, Teyfur adlı şəxs artıq bir ildir ki, sözügedən ərazidə quyu qazıb və yaxın günlərdə həmin ərazidə ikinci bir quyu da qazılıb. Diqqətçəkən məqam isə ondan ibarətdir ki, həmin şəxs özü bu küçədə yaşamır, lakin ərazidə bu cür təhlükəli qazıntılar aparır.

Sakinlər bildirirlər ki, quyuların nə məqsədlə qazıldığı bəlli deyil, lakin onların bu formada sahibsiz və nəzarətsiz şəkildə qalması həm ətraf mühitə, həm də insanların təhlükəsizliyinə ciddi təhdid yaradır. Xüsusilə uşaqlar və nəqliyyat vasitələri üçün real təhlükə formalaşıb. Ən yaxşı halda isə quyular antisanitar vəziyyətə səbəb olur.

Məsələ ilə bağlı danışan sakinlər aidiyyəti qurumlara müraciət edərək, quyuların araşdırılmasını, təhlükə mənbəyinin aradan qaldırılmasını və məsul şəxslərin cavabdeh tutulmasını istəyirlər. Onların sözlərinə görə, gözlənilmədən baş verə biləcək bir bədbəxt hadisə artıq gec ola bilər.

Sumqayit.tv olaraq mövzu ilə bağlı aidiyyəti qurumların münasibətini işıqlandırmağa hazırıq.