Sumqayıt şəhərinin bir sıra yaşayış massivlərində ağacların quruması müşahidə olunur.
Sumqayit.tv-in redaksiyasına daxil olan bu görüntü şəhərin 9-cu mikrorayon 51-ci binanın həyətində çəkilib. Fotodan da açıq şəkildə görünür ki, ağac artıq tamamilə quruyub, digər yaşıllıqlarla müqayisədə öz canlılığını itirib.

Mütəxəssislərin fikrincə, bir ağac 1 həftəyə və ya 1 aya qurumur. Bu proses illərlə davam edən nəzarətsizliyin və aqrotexniki qulluq çatışmazlığının nəticəsidir. Qurumuş ağaclar təkcə ekoloji deyil, həm də fiziki baxımdan təhlükə mənbəyidir – xüsusən də uşaqların oynadığı məkanlarda.

Aydındır ki, torpaq mülkiyyətçiləri, yəni, yerli icra hakimiyyəti və bələdiyyələr öz ərazilərindəki yaşıllıqların vəziyyətinə vaxtaşırı monitorinq aparmalı, müvafiq suvarma və qulluq işlərini təmin etməlidir.

Unutmaq olmaz ki, bir ağacın quruması həm oksigen balansına, həm də ümumi mikroiqlimə mənfi təsir göstərir. İqlim dəyişikliyinin sürətləndiyi bir vaxtda, şəhər mühitində hər ağacın qorunması mühüm əhəmiyyət daşıyır.