Yeni sistem məhkəmə ekspertizası prosesində şəffaflığı və operativliyi artıracaq

Sumqayit.tv xəbər verir ki, Prezident İlham Əliyev məhkəmə ekspertizası sahəsində fəaliyyətin elektronlaşdırılması, şəffaflığın və operativliyin artırılması məqsədilə “Məhkəmə Ekspertizası” informasiya sisteminin yaradılması haqqında Fərman imzalayıb.

Sənədə əsasən, dövlət orqanlarının məhkəmə ekspertizası ilə bağlı fəaliyyətinin vahid elektron sistem üzərindən aparılması, ümumi məlumat bazasının formalaşdırılması və idarə olunması təmin ediləcək.

Yeni sistem vasitəsilə məhkəmə ekspertizalarının təyin edilməsi, icraata yönləndirilməsi, ekspert rəylərinin elektron şəkildə təqdim olunması, proseslərin izlənilməsi və hesabatlılıq təmin ediləcək. Həmçinin bəzi məhkəmə ekspertizalarının elektron qaydada keçirilməsi mümkün olacaq.

Sistemin sahibi və operatoru funksiyalarını Azərbaycan Respublikasının Ədliyyə Nazirliyi həyata keçirəcək. Layihənin icrası dövlət büdcəsi hesabına maliyyələşdiriləcək.

Ədliyyə Nazirliyinə, eləcə də Rəqəmsal İnkişaf və Nəqliyyat Nazirliyinə sistemin "Hökumət buludu" (G-cloud) üzərində yerləşdirilməsi və digər texniki tədbirlərin həyata keçirilməsi tapşırılıb.

Prezidentin imzaladığı bu Fərman məhkəmə ekspertizası fəaliyyətində şəffaflığı artırmaq, sui-istifadə hallarının qarşısını almaq və ədalət mühakiməsinin obyektivliyini daha da möhkəmləndirmək məqsədi daşıyır.

4-11-2025, 17:09 115