Bayram günlərində səfərə çıxan sürücülər hərəkət marşrutlarını əvvəlcədən planlaşdırmalıdırlar.

Sumqayit.tv xəbər verir ki, bu barədə Baş Dövlət Yol Polisi İdarəsi (BDYPİ) Zəfər Günü və Dövlət Bayrağı Günü ilə əlaqədar müraciət yayıb.

Məlumatda qeyd olunur ki, 8–11 noyabr tarixlərini əhatə edən ardıcıl istirahət günlərində ölkə üzrə, o cümlədən Sumqayıt-Bakı və Sumqayıt-Quba istiqamətlərində nəqliyyat axınının intensivləşəcəyi gözlənilir.

“Sürücülər yola çıxmazdan əvvəl idarə etdikləri avtomobillərin texniki vəziyyətini diqqətlə yoxlasınlar — xüsusilə tormoz sistemi, şinlərin aşınma dərəcəsi, işıq cihazları və şüşəsilənlərin işləkliyinə nəzarət etsinlər.
Uzun məsafəyə çıxmazdan əvvəl istirahət etsinlər, yorğun və yuxusuz halda sükan arxasına keçməsinlər”, – BDYPİ-nin müraciətində deyilir.

İdarə bildirir ki, sürət həddinə ciddi riayət olunmalı, riskli manevrlərdən və qəfil ötmələrdən çəkinərək ara məsafəsi düzgün saxlanmalıdır.
Uşaqların avtomobildə daşınması zamanı təhlükəsizlik kəməri və uşaq oturacağından istifadə vacib sayılır.
Spirtli içki qəbul etmiş şəxslərin sükan arxasına keçməsi isə qəti şəkildə yolverilməzdir.

Eyni zamanda piyadalardan da qaydalara əməl etmək tələb olunur:

“Piyadalar yalnız müəyyən olunmuş keçidlərdən istifadə etsinlər, işıqforun siqnallarına əməl etsinlər və axşam saatlarında geyimlərində işıq əks etdirici elementlərə üstünlük versinlər.”

BDYPİ-nin şəxsi heyəti bayram günlərində gücləndirilmiş iş rejimində xidmət aparacaq. Məqsəd – yollarda təhlükəsizliyi təmin etmək və qəza risklərini minimuma endirməkdir.

“Unutmayaq ki, özümüzün və sevdiklərimizin təhlükəsizliyi hər birimizin davranışından asılıdır.”

7-11-2025, 10:32 75