12 noyabrdan 500 nömrəli yeni avtobus xətti fəaliyyətə başlayacaq

Sumqayit.tv xəbər verir ki, Bakı və Sumqayıt şəhərləri arasında 500 nömrəli yeni müntəzəm avtobus marşrutu istifadəyə verilir.

Bu barədə məlumatı Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) yayıb.

Qurumdan bildirilib ki, Sumqayıt şəhərindən paytaxta olan böyük sərnişin axını nəzərə alınaraq, həmçinin vətəndaşların metronun “20 Yanvar” stansiyası istiqamətində daha rahat və sürətli hərəkətini təmin etmək məqsədilə yeni marşrut xətti təşkil edilib.

Yeni 500 nömrəli marşrut üzrə avtobuslar 12 noyabr 2025-ci ildən fəaliyyətə başlayacaq.

Yeni avtobus xətti Sumqayıt şəhərinin Zülfü Hacıyev küçəsindən (Heydər Əliyev parkı) başlayacaq, Nəriman Nərimanov küçəsi, Sülh prospekti və Ceyranbatan qəsəbəsindən keçməklə paytaxtın Seyid Cəfər Pişəvari küçəsinədək hərəkət edəcək.

Avtobuslar səhər saat 05:45-dən axşam 23:00-dək fəaliyyət göstərəcək.
Hərəkət intervalı 7-8 dəqiqə təşkil edəcək.

Gedişhaqqı 0.80 manat olaraq müəyyənləşdirilib və ödənişlər yalnız nağdsız qaydada həyata keçiriləcək.

Yeni marşrut xəttində 20 ədəd ekoloji cəhətdən təmiz, CNG texnologiyası ilə təchiz edilmiş böyüktutumlu avtobus sərnişinlərə xidmət göstərəcək.

AYNA-nın məlumatına görə, bu addım həm Sumqayıt–Bakı istiqamətində nəqliyyat sıxlığını azaltmaq, həm də ictimai nəqliyyatda rahatlığı artırmaq məqsədi daşıyır.

Bildirilir ki, yeni avtobus marşrutu şəhərlərarası gediş-gəlişi daha sürətli, rahat və sərfəli edəcək.

12-11-2025, 00:30 155