Sumqayıt şəhərinin Yaşıl Dərə massivi, Daşaltı küçəsində yaşayan sakinlər yol və kanalizasiya problemi ilə bağlı Sumqayit.tv-yə şikayət videosu göndəriblər.

Sakinlərin bildirdiyinə görə, ərazidə yolun asfalt örtüyü tamamilə yararsız vəziyyətdədir. Kanalizasiya sisteminin olmaması səbəbindən axan sular bir nöqtədə toplanaraq gölməçə yaradır, bu isə ərazidə üfunət, antisanitariya və sağlamlıq üçün təhlükəli vəziyyət formalaşdırır.

Şikayətçi müraciətində qeyd edir ki, ailəsində əlil övladı var. Təcili tibbi yardıma ehtiyac yarandığı hallarda çağırış edilərkən ünvan dəqiqləşdirildikdən sonra Təcili Tibbi Yardım briqadaları əraziyə gəlməkdən imtina edir. Səbəb kimi isə yolların son dərəcə bərbad vəziyyətdə olması göstərilir.

Bundan əlavə, sakinlər bildirirlər ki, taksi xidmətləri də bu əraziyə sifariş qəbul etmir, bu isə gündəlik həyatı və xüsusilə xəstə və əlillərin hərəkətini ciddi şəkildə çətinləşdirir.

Sakinlər problemin uzun müddətdir davam etdiyini vurğulayaraq, aidiyyəti qurumlardan təcili tədbir görülməsini xahiş edirlər.

Sumqayit.tv məsələni diqqətdə saxlayır və aidiyyəti qurumların mövqeyini işıqlandırmağa hazırdır.

VİDEO LİNK: (8)Sumqayıtda yol və kanalizasiya problemi ciddi təhlükə yaradır Sumqayıt... | TikTok

Dünən, 11:02 37