Sumqayıt şəhər İcra Hakimiyyətinin başçısı Zakir Fərəcov Belçika Krallığının Azərbaycandakı fövqəladə və səlahiyyətli səfiri Julyen de Frepon ilə görüş keçirib.

Sumqayit.tv xəbər verir ki, görüş zamanı şəhər rəhbəri Sumqayıtın sənaye şəhəri kimi inkişafı, əhalinin məşğulluğu, sosial infrastruktur və son illərdə həyata keçirilən abadlıq-quruculuq işləri barədə məlumat verib. Qeyd olunub ki, Sumqayıt hazırda Cənubi Qafqazın aparıcı sənaye mərkəzlərindən biri olmaqla yanaşı, innovativ layihələrin həyata keçirildiyi strateji şəhərlər sırasındadır.

Bildirilib ki, sənaye müəssisələrinin modernləşdirilməsi, yeni texnologiyaların tətbiqi və ixracyönümlü istehsalın genişləndirilməsi istiqamətində işlər davam etdirilir. Xarici investorlar üçün yaradılan biznes mühiti və tətbiq olunan güzəştlərin beynəlxalq əməkdaşlıq imkanlarını artırdığı vurğulanıb.

Səfir Julyen de Frepon Sumqayıtda müşahidə etdiyi inkişaf prosesini yüksək qiymətləndirərək Azərbaycan–Belçika əlaqələrinin geniş potensiala malik olduğunu bildirib.

Görüşdə sənaye, logistika, alternativ enerji və təhsil sahələrində əməkdaşlıq perspektivləri müzakirə olunub. Səfər çərçivəsində diplomat şəhərin bir sıra obyektləri və sənaye müəssisələri ilə də tanış olub.

2-03-2026, 16:11 199