Qarşıdan gələn Novruz və Ramazan bayramları ilə əlaqədar mart ayı üzrə pensiya, müavinət və təqaüdlərin ödənişi qrafikdən əvvəl həyata keçiriləcək.

Sumqayit.tv xəbər verir ki, bu barədə Əmək və Əhalinin Sosial Müdafiəsi Nazirliyi məlumat yayıb.

Məlumata əsasən, martın 6-da Dövlət Sosial Müdafiə Fondu tərəfindən Bakı və Sumqayıt şəhərləri, eləcə də Abşeron rayonu üzrə pensiyaların ödənilməsi planlaşdırılır.

Digər bölgələr üzrə, o cümlədən güzəştli şərtlərlə pensiya alan şəxslərin də vəsaitlərinin Novruz və Ramazan bayramları ərəfəsində köçürülməsi nəzərdə tutulur.

Naxçıvan Muxtar Respublikası üzrə isə mart ayının pensiya ödənişlərinə artıq başlanılıb.

Bundan əlavə, mart ayı üzrə sosial müavinət və təqaüdlərin də bayramlara qədər və qrafikdən əvvəl ödənilməsi planlaşdırılır.

Xatırladaq ki, Azərbaycanda martın 20-24-ü Novruz bayramı, 20-21-i isə Ramazan bayramı günləri kimi qeyd olunur.

4-03-2026, 13:58 65