Sumqayıt şəhəri 4-cü mikrorayon, 17 saylı binanın qarşısında yerləşən ərazi sakinləri uzun illərdir davam edən yol problemi ilə bağlı narazılıqlarını bildirirlər.

Bu barədə sakinlər Sumqayit.tv-yə müraciət edərək qeyd ediblər ki, Mənzil-Kommunal Təsərrüfatı idarəsinə yaxın yerləşən küçələr və məhəllədaxili yollar uzun müddətdir bərbad vəziyyətdədir.

Onların sözlərinə görə, dağılmış yol örtüyü həm ərazinin ümumi görünüşünə mənfi təsir göstərir, həm də piyadaların və avtomobillərin gediş-gəlişini çətinləşdirir.

Sakinlər bildirirlər ki, xüsusilə yağışlı havalarda vəziyyət daha da ağırlaşır, yaşlı insanların, uşaqların və sakinlərin hərəkəti üçün ciddi maneələr yaranır.

Qeyd olunur ki, şəhərin mərkəzinə yaxın ərazilərdən biri olmasına baxmayaraq, burada uzun illərdir əsaslı təmir işləri aparılmayıb.

Ərazi sakinləri aidiyyəti qurumlardan məsələyə diqqət ayrılmasını, yolların yenidən qurulmasını və mikrorayonda abadlıq işlərinin görülməsini xahiş edirlər.

Ümid edilir ki, məsələ ilə bağlı aidiyyəti qurumlar qısa zamanda tədbir görəcək.

24-04-2026, 19:00 455