“Bu hadisənin arxasında İran olsa, bundan ən çox zərəri elə İranın özü görə bilər.”

Yenicag.az xəbər verir ki, bu sözləri politoloq Elçin Abdullayev Vaşinqtonda ABŞ prezidenti Donald Trampa qarşı törədilən sui-qəsd cəhdinin pərdəarxasını şərh edərkən deyib.

Politoloq qeyd edib ki, hadisə Amerika təhlükəsizlik sistemindəki çatışmazlıqları çılpaqlığı ilə üzə çıxarıb:

“Silahlı bir şəxsin bir neçə ştatı keçərək ABŞ prezidentinin iştirak etdiyi tədbirə daxil olması ondan xəbər verir ki, Amerikanın ‘təhlükəsizlik çətiri’ dayanıqlı deyil. Eyni zamanda, bu fakt bir daha təsdiqləyir ki, Tramp dünyada terrorla üzləşə biləcək ən riskli siyasətçilərdən biridir və onun üçün hər an belə bir təhlükə gözləniləndir”.

E.Abdullayev hesab edir ki, bu sui-qəsd planında İranın izinin tapılması hərbi əməliyyatların miqyasını genişləndirə bilər:

“Məsələnin İranla bağlantısına gəldikdə isə, general Qasım Süleymani öldürüləndən sonra Tehran rəsmiləri bunun qisasını Trampdan alacaqları ilə bağlı dəfələrlə bəyanatlar səsləndiriblər. Lakin dünən baş verən hadisənin arxasında birbaşa İran dövlətinin dayandığını düşünmürəm.

Doğrudur, İran rəsmiləri bəlkə də belə bir hadisənin baş tutmasına sevinə bilərlər, amma hesab edirəm ki, Tehran üçün belə bir terror aktına cəhd etmək həddindən artıq riskli addımdır. Əgər belə bir hal sübuta yetirilərsə, ABŞ İrana qarşı hərbi əməliyyatların miqyasını kəskin şəkildə genişləndirər və bu prosesdən ən böyük zərbəni məhz rəsmi Tehran alardı”.

Nurlan Cəfəri

Bu gün, 17:04 7