Sumqayıtın Yaşıl Dərə massivində 10A marşrutu ilə bağlı sakinlərdən növbəti şikayət daxil olub.

Sumqayit.tv-yə müraciət edən sakinlər bildirirlər ki, son günlər 10A nömrəli marşrut avtobuslarının hərəkət intervalı xeyli uzanıb. Onların sözlərinə görə, əvvəllər təxminən 4 dəqiqə olan gözləmə müddəti hazırda bəzi hallarda 30 dəqiqəyə çatır.

Sakinlər iddia edirlər ki, xətt üzrə avtobusların sayı da azaldılıb. Nəticədə dayanacaqlarda uzun müddət gözləməli olur, xüsusilə həftəsonları vəziyyət daha da çətinləşir.

Vətəndaşların sözlərinə görə, hazırda şəhərin mərkəzi küçələrində yol-təmir işləri aparıldığı üçün marşrut avtobusları alternativ küçələrlə hərəkət edir və bu da gecikmələrə səbəb olur. Lakin sakinlər hesab edirlər ki, yaranmış vəziyyətdə avtobusların sayının artırılması və intervalın qısaldılması daha məqsədəuyğun olardı.

Şikayətçilər bildirirlər ki, məsələ ilə bağlı dəfələrlə aidiyyəti qurumlara müraciət etsələr də, problem hələ də həllini tapmayıb.

Sakinlər aidiyyəti qurumlardan 10A marşrut xəttində avtobusların sayının artırılmasını və hərəkət intervalının normallaşdırılmasını xahiş edirlər.

Qeyd edək ki, Sumqayit.tv məsələ ilə bağlı aidiyyəti qurumun mövqeyini dərc etməyə hazırdır.

29-06-2026, 11:26 62