Sumqayıt sakinləri yaşadıqları ərazidə gediş-gəliş yolunun olmamasından şikayətlənir. 

Bu haqda Sumqayit.tv-nin redaksiyasına vətəndaşların şikayəti daxil olub. Onlar yaşadıqları Sumqayıt şəhəri 5-ci mkr ərazisində, daha konkret 15 nömrəli orta məktəblə Sumqayıt Gənclər Evi arasında olan ərazidən şikayətçidi. Sakinlərin fikirlərini təqdim edirik: "Artıq neçə ildi 15 nömrəli orta məktəbin sol tərəfi hasarlanıb, yandakı UGİM də digər tərəfini hasarlayıb. Vaxtilə bu ərazidə futbol, basketbol və idman etmək üçün bir çox vasitələr mövcud idi. Uşaqların oynamağa, idman etməyə yerləri var idi. İnsanlar burada asudə vaxtlarını keçirirdilər, gəzintiyə çıxırdılar. Üstəlik, əvvəllər insanların normal hərəkət etdiyi yerlər bağlanıb, Quantanama həbsxanasına oxşayır. Sonra da deyirlər ki, uşaqlarda psixi xəstəliklər çoxalıb, gənclər narkomaniya meyl edir. Uşaqlar idmanla məşğul olsa, asudə vaxtlarını keçirməyə yer olsa, belə olmaz. SSRİ dönəmində bu ərazi Sumqayıtın ən fəal yeri idi. Müxtəlif idman növləri ilə məşğul olan gənclər var idi. İndi isə türmə düzəldirlər. Məktəb, idman kompleksi, gənclər evi niyə hasarlanır ki? Bu ərazilər uşaqlara, gənclərə, insanlara xidmət edirsə niyə belə edirlər ? Zavod ərazisi deyil ki təhlükəsizliyə görə hasarlana. Ərazidən insanlar istifadə edirsə, hərəkət etməyə yol olmalıdı. Niyə əsəblərimizi tarıma çəkirlər ? Uşaq, qoca, işə gedən, işdən gələn bilmir hardan keçsin? Binaların damı ilə gedib-gəlməliyik ? İstər-istəməz avtomobillər də hamının istifadə etdiyi dar yola girməli olur. Adam nə qədər başqaları ilə dava-dalaşa çıxar ?! Gərək kimsə kimisə vursun öldürsün, ondan sonra tədbir görələr. Nə idman kompleski tərəfdən yol var, nə məktəb tərəfdən. Aidiyyatı qurumlardan məsələnin müsbət həlli yönündə tədbir görməsini xahiş edirik".