Ötən il Sumqayıt şəhərində yerləşən Şəhidlər xiyabanında təmir-bərpa işləri aparıldı. Xiyabanda fəvvarə quruldu, “zəfər çalmış əsgər” abidəsi qoyuldu.

Ərazinin daş örtüyü yeniləndi. Geniş yaşıllıq zolağı salındı, çoxlu ağaclar əkildi. Giriş hissədə olan tikili də yeniləndi. Noyabrın 8-i zəfər günündə xiyabanın açılışı oldu. Amma girişdə məscid kimi istifadə olunacağı deyilən tikili bu günə qədər bağlı saxlanılır. Bu isə ibadət etmək istəyənlər üçün çətinlik yaradır. Şəhid valideynləri bununla bağlı aidiyyatı orqanlara müraciət edib. Amma hələ ki, tikili qapalı olaraq qalır. Xiyabanın mollası kimi tanın Hacı Mirmahir ağa Sumqayit.tv-yə açıqlamasında bunları deyib: “Artıq 4 aydı xiyabanın açılışı olub. Burda 500-dən çox şəhidimiz uyuyur. Allah hamısına rəhmət eləsin! Bir çox xiyabanlarda olduğu kimi burda da xiyabanın girişində məscid inşa olunub. Amma qapısı bu günə qədər bağlıdı. İçəridə dəstəmaz almaq üçün şərait də yaradılıb. Çox gözəl təmir olunub. Məscid ibadət üçündü, Allahın evi sayılır. Bağlı qalmağı isə bizə çətinlik yaradır. Bütün günü burda oluram. İbadət üçün yer olsa da, qapısı bağlıdı. Hər halda, bizim də oturmağa yerimiz olmalıdı. Bura gələn insanlar arasında da ibadət etmək istəyənlər var. Hər dəfə mənə sual verirlər ki, bura nə vaxt açılacaq? Aidiyyatı qurumlardan xahiş edirəm ki, yenicə təmir olunmuş məscidin açılması üçün kömək etsinlər”.