Sumqayıt şəhər 15-ci məhəllədə yerləşən 5 saylı yataqxana, mənzil 27-də yaşayan Verdiyev Şahlar Allahverdi oğlu xəstəliyi üzrə aldığı təqaüdün kəsilməsindən şikayətçidir.
 
Sumqayit.tv Xeberle.com -a istinadən xəbər verir ki, Ş. Verdiyev 2010-cu ildə əməliyyat olunub və qazandığı əlilliyə görə 2012-ci ildən xəstəliyi üzrə təqaüd təyin edilir. Lakin 2021-ci ilin may ayında təqaüdü kəsilən vətəndaşa səbəb kimi isə, bu xəstəliklə pensiya təyin olunmadığı bildirilib. 16 dəfə əməliyyat keçirən Ş. Verdiyevin yenidən əməliyyat olunmasına ehtiyac var və buna maddi imkanı olmadığını bildirir.
Dövlət Tibbi-Sosial Ekspertiza və Reabilitasiya Agentliyindən Xeberle.com-un sorğusuna cavab olaraq bildirilib ki, Verdiyev Şahlar Allahverdi oğlu 2021-ci ilin may ayında əlillik müddəti bitib. Vətəndaşın əlillik müddətinin uzadılması ilə bağlı göndərişinə 17.06. 2021-ci il tarixdə imtina edilib:
"İmtinaya səbəb vətəndaşın son beş il ərzində aldığı stasionar müalicə müddətinin yetərli olmamasıdır. Bundan əlavə səhiyyə müəssisəsi tərəfindən elektron formada göndərilən Forma 88 səthi və keyfiyyətsiz tərtib edilmişdir.
Həzm sistemi xəstəlikləri ilə bağlı Nazirlər Kabinetinin 413 nömrəli qərarına əsasən il ərzində ən azı 4 dəfə kəskinləşmə verən, ümumi qidalanmanın kəskin zəifləməsi və qan azlığı(anemiya) əsasında əlillik təyinatı aparılır. Vətəndaşda qan azlığı qeydə alınmayıb, ümumi qidalanmanın pozulması, boy və çəki haqqında heç bir məlumat qeyd olunmayıb. Hemoqlobinin miqdarı 120-dir (normal göstəricidir). Bu səbəblərlə əlilliyin qiymətləndirilməsi ilə bağlı göndərişə əsaslı olaraq imtina edilmişdir”
.Xədicə Səxavətqızı
Xeberle.com