Bu gün - 28 iyun Azərbaycan ordusu tarixində əlamətdar hadisə ilə yadda qalıb. Belə ki Azərbaycan ordusunun Füzulidə icra etdiyi genişmiqyaslı əməliyyatın 30 ili tamam olur. 

Bu haqda Azərbaycan Bayrağı Ordenli, hər iki müharibənin iştirakçısı, Füzuli və Xocavəndin azad olunması medalı ilə təltif olunan, sabiq hərbi hissə komandiri Zahir Həsənov məlumat verib: "Bu əməliyyat Azərbaycan ordusu tarixində xüsusi yer tutur. 28 iyun 1992-ci ildə icra olunan əməliyyat 72 km ərazini əhatə edib. Əməliyyatda 814, 839, 848, Füzuli rayonuna ezam olunmuş  702, 721, 723 saylı hərbi hissələr iştirak edib. Əsas məqsəd düşməni sərhədlərimizdən kənarlaşdırmaq idi. Həmin dönəmdə Dağlıq Qarabağ Muxtar vilayəti var idi. Ermənilər Azərbaycan əhalisinə böyük problemlər yaradırdı. Əməliyyatın məqsədi erməniləri Xocavəndin kəndləri və Hadrutdan sıxışdırıb çıxarmaq idi. Təəssüf ki əməliyyatda kiçik dəyişikliklər oldu və bu, çox gec üzə çıxdı. Bütün bunlara baxmayaraq, 28 iyunda düşmənə ciddi zərbə vuruldu, ordumuz erməniləri o ərazilərdən qovub çıxardı. Rəhbərlik etdiyim 848 saylı hərbi hissə Cəbrayıl-Füzuli sərhədindən Füzulinin Cuvarlı kəndinə qədər olan ərazini əhatə  edirdi. Biz Hadrut rayon mərkəzi, onun kəndləri Məlikcan, Xırmancıq, Bulutan kəndləri, o cümlədən Ərgünəş istiqamətində uğurlar əldə etdik. Qismən qələbə qazandıq. Bu onu göstərdi ki, Azərbaycan ordusu yaranıb. Əliyalın və silah-sursat çatışmazlığı olsa da, qələbə qazana bildik.
Sonda Azərbaycan ordusun əsgər və zabit heyətini, 26 iyun Silahlı Qüvvələr Günü, 28 iyun ordumuzun ilk genişmiqyaslı əməliyyat günü münasibəti ilə təbrik edir, yeni-yeni qələbələr arzu edirəm".