Vətəndaşlara müasir standartlara uyğun tibbi xidmətin göstərilməsi məqsədilə Sumqayıt şəhəri, 13-cü mikrorayon, ev 55 ünvanında fəaliyyət göstərən Sumqayıt Tibb Mərkəzinin 2 nömrəli Şəhər Xəstəxanasının Poliklinika şöbəsinin öz balansına qaytarılması qərara alınıb.

Sumqayit.tv xəbər verir ki, bu barədə Sumqayıt Tibb Mərkəzindən məlumat verilib. Bildirilir ki, evral ayının 3-dən poliklinika şöbəsi 52-ci məhəllədə yerləşən 2 nömrəli Şəhər Xəstəxanasının binasında vətəndaşlara tibbi xidmət göstərəcək.

Sumqayıt Tibb Mərkəzinin balansında olmayan və hazırda icarə əsasında poliklinika şöbəsinin fəaliyyət göstərdiyi binada uzun müddət istismar olunması səbəbindən qəzalı vəziyyət yaranıb.

Qeyd edək ki, 2 nömrəli Xəstəxananın inzibati binası yenidən tikilərək 2023-cü ilin oktyabrın 23-də Prezident İlham Əliyevin iştirakı ilə açılışı həyata keçirilib. Ən son müasir avadanlıqlarla təchiz olunan xəstəxana əhaliyə yüksək səviyyədə tibbi xidmət göstərir.

Görülən bütün işlər əhaliyə müasir standartlara uyğun olaraq yüksək səviyyədə tibbi xidmətin göstərilməsi üçün nəzərdə tutulub.