Yaponiya və Koreya vətəndaşları Azərbaycana vizasız səfər edə biləcəklər

2026-cı il iyulun 1-dən 2027-ci il iyulun 1-dək Yaponiya və Koreya Respublikasının ümumvətəndaş pasportuna malik vətəndaşlarının Azərbaycana turizm məqsədilə səfərləri üçün viza tələbi ləğv edilib.

Sumqayit.tv xəbər verir ki, bu barədə Dövlət Miqrasiya Xidməti məlumat yayıb.

Məlumata əsasən, qərar vətəndaşların səyahət imkanlarının asanlaşdırılması, ölkələr arasında əməkdaşlığın genişləndirilməsi və turizmin inkişafının təşviqi məqsədilə qəbul olunub.

Yeni qaydalara görə, Yaponiya və Koreya vətəndaşları göstərilən müddət ərzində Azərbaycana üç dəfə vizasız daxil ola və hər səfər zamanı ölkədə 30 günədək qala bilərlər.

Turizm məqsədindən fərqli səbəblərlə Azərbaycana gəlmək və ya ölkədə daha uzun müddət qalmaq istəyən şəxslər isə qanunvericiliyə uyğun qaydada müvafiq viza almalıdırlar.

Dövlət Miqrasiya Xidməti xatırladıb ki, Azərbaycanda 15 gündən artıq müvəqqəti qalan əcnəbilər Miqrasiya Məcəlləsinin tələblərinə uyğun olaraq olduqları ünvan üzrə qeydiyyata alınmalıdırlar. Bununla yanaşı, qanunvericilikdə nəzərdə tutulan hallarda onlar müvəqqəti olma müddətinin uzadılması və ya müvəqqəti yaşama icazəsi üçün "ASAN xidmət" mərkəzlərində fəaliyyət göstərən "miqrasiya xidmətləri" pəncərəsi və ya Dövlət Miqrasiya Xidmətinin elektron xidmətləri vasitəsilə müraciət edə bilərlər.

1-07-2026, 11:08 54