Sumqayıt Poeziya evində keçirilən müşavirədə gündəlikdə duran bir sıra məsələlər, cari problemlər və gələcək perspektivlər müzakirə olunub.

Sumqayıt Regional Mədəniyyət İdarəsinin rəisi Rəşad Əliyev çıxış edərək, müasir dövrdə Yaradıcı və Mədəniyyət Sənayelərinin (YMS) dünya iqtisadiyyatında dinamik inkişaf edən sektorlardan birinə çevrildiyini, Azərbaycan xalqının zəngin yaradıcılıq irsi olduğunu qeyd edərək, yaradıcı sənayenin vətəndaşların özünüməşğulluğunun təşkilində yeni imkanlar açdığını dedi. Bunun üçün ölkəmizdə bu sənayelərin yaradıcı potensialının üzə çıxarılmasının, yerli yaradıcı məhsul və xidmətlərin ölkə daxilində və xarici bazarlarda reklamının və satışının təşkilinin, mədəniyyət sahələrinin iqtisadi sahə kimi tanınmasına və bu kateqoriyadan olan şəxslərin maddi rifahının yüksəlməsinə töhfə verəcəyini bildirdi.

İdarə rəisi Azərbaycan Respublikası Mədəniyyət Nazirliyinin sistemindəki uşaq musiqi, incəsənət, rəssamlıq, muğam, aşıq məktəb və mərkəzlərində təhsilin keyfiyyətinin yüksəldilməsi, bilikli və bacarıqlı ixtisaslı kadrların bərabərhüquqlu, şəffaf və sağlam rəqabət şəraitində seçilib yerləşdirilməsi məqsədilə cari ildə Dövlət İmtahan Mərkəzi tərəfindən müvafiq imtahanların keçirildiyini, hər iki mərhələdə uğur qazanmış müəllimlərin işə qəbuluna həssas yanaşma nümayiş etdirilməsinin, onlar üçün müvafiq iş şəraitinin yaradılmasının vacibliyini vurğuladı.

Müşavirədə, həmçinin mədəniyyət müəssisələrinin kadr potensialının inkişafına və əmək intizamının gücləndirilməsinə diqqətin artırılması, fəaliyyətin Əsas Effektivlik Göstəriciləri (KPİ) üzrə qurulmasının prioritet məsələ olduğu diqqətə çatdırdı. Mətbuatla işin gücləndirilməsi, sosial şəbəkələrin yaratdığı imkanlardan düzgün istifadə etməklə bu istiqamətdə gedən işlərin sistemli şəkildə qurulmasının vacibliyindən söz açıldı.

İdarə rəisi çıxışının sonunda problemlərin aradan qaldırılması, müəssisələrin daha səmərəli fəaliyyətinin təşkili ilə bağlı müvafiq tapşırıq və tövsiyələrini verdi, tədbir iştirakçlarının suallarını cavablandırdı.