Bu gün 27.09.2020-ci ildə başlayan Vətən müharibəsi zamanı şəhid olan Azərbaycan Silahlı Qüvvələrinin əsgəri Əliyev Aydın Nəriman oğlunun şəhadətə ucaldığı gündür. Sumqayit.tv xəbər verir ki, şəhidimizin anım mərasimi Şəhidlər Xiyabanında məzarını ziyarət edilərək başlayıb, sonra isə mərasim evlərinin birində ehsan süfrəsi verilərək davam edib. Tədbir şəhidlərimizin ruhlarına 1 dəqiqəlik sükutla və Azərbaycan Respublikasının Himni ilə başlayıb. Məclisdə İcra Hakimiyyətinin nümayəndələri, iş yoldaşları, döyüş yoldaşları, qazilər, 9, 8, və 1 nömrəli məktəbin şagirdləri və müəllim kollektivi, şəhidimizin valideynlərinin iş yoldaşları və şəhid ailələri iştirak ediblər.
Xatırladaq ki, Aydın Əliyev 09.01.1991-ci il tarixində Sumqayıt şəhərində anadan olub. SOCAR-ın Karbamid Zavodunda fəaliyyət göstərib. Aydın Əliyev bir müddət Azərbaycan Silahlı Qüvvələrinin sıralarında həqiqi hərbi xidmət qulluqçusu olub. Hərbi xidmətini başa vurduqdan sonra mülki fəaliyyətinə davam edib.
Azərbaycan Ordusunun əsgəri olan Aydın Əliyev 27.09.2020-ci ildə Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində könüllü olaraq iştirak edib. Cəbrayılın, Xocavəndin və Füzulinin azadlığı uğrunda gedən döyüşlərdə vuruşub. Aydın Əliyev 07.11.2020-ci ildə Füzuli rayonu istiqamətində döyüş tapşırığının yerinə yetirilməsi zamanı ağır yaralanıb və hərbi tibb müəsissələrindən birinə yerləşdirilib. 28.11.2020-ci ildə müalicə aldığı xəstəxanada koma vəziyyətində olarkən şəhidlik məqamına ucalıb. 
Azərbaycan Prezidenti İlham Əliyevin Sərəncamına əsasən Əliyev Aydın ölümündən sonra "Vətən uğrunda", "Cəbrayılın azad olunmasına görə", "Xocavəndin azad olunmasına görə", "Füzulinin azad olunmasına görə", "İgidliyə görə" və "Şuşanın azad olunmasına görə" medalları ilə təltif edilib. 
Ruhun şad olsun, Vətənimizin mərd oğlu!

Jurnalist:Vəsiqə DADAŞOVA