Bu gün Azərbaycan Silahlı Qüvvələrinin leytenant şəhidi Qorçuyev Anar Nadir oğlunun doğum günüdür. Sumqayit.tv xəbər verir ki, şəhidimizin mövlud mərasimi Şəhidlər Xiyabanında məzarını ziyarət edilərək başlayıb, sonra isə mərasim evlərinin birində ehsan süfrəsi verilərək davam edib. Məclisdə qohumlar və şəhid ailələri iştirak ediblər. Qeyd edək ki, Anar Qorçuyev 04.01.1987-ci tarixdə Qubadlı rayonunun Çardaqlı kəndində anadan olub. 1993-cü ildə Qubadlı rayonunun Ermənistan Silahlı Qüvvələri tərəfindən işğal edilməsindən sonra Qorçuyevlər ailəsi Sumqayıt şəhərində yaşamağa başlayıblar. Azərbaycan Ordusunun leytenantı olan Anar Qorçuyev 27.09.2020-ci il tarixində Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə savaşıb. Anar Qorçuyev oktyabrın 7-də Füzuli döyüşləri zamanı şəhid olub. Cismən həyatda olsaydı 36 yaşı olacaqdı. Dəyişilməyən yaşın mübarək, Şəhidim!
4-01-2023, 18:52
341
