Sumqayıt Dövlət Dram Teatrında “Xeyir xəbər” tamaşasının premyerası olub. Səhnə əsəri Əməkdar incəsənət xadimi Əli Əmirlinin “Xeyir xəbər” pyesi əsasında hazırlanıb. Tamaşanın rejissoru teatra dəvət olunmuş istedadlı gənc Fuad Cavadzadədir.
Sumqayit.tv xəbər verir ki, tamaşa 44 günlük Vətən müharibəsində əldə etdiyimiz Qələbəyə ithaf olunub.
Əsərdə bir ailənin taleyi kontekstində milli-mənəvi dəyərlər, təmkin, iradə və Vətən sevgisi təbliğ olunur. Obrazların qarışıq duyğularını, psixoloji məqamlarını və fərdi iztirablarını üstələyən Vətən sevgisi quruluşçu rejissor tərəfindən həssaslıqla işlənilib.
Yeni yaradıcılıq işinin bədii rəhbəri Xalq artisti Firudin Məhərrəmov, quruluşçu rəssamı Nizami Dadaşov, musiqi tərtibatçısı sənətşünaslıq üzrə fəlsəfə doktoru Telman Qəniyevdir.
Səhnə əsərində Əməkdar artist Elmira Kərimova, aktyorlar Habil Xanlarov, Məryəm Hüseynli, Şəmistan Süleymanlı, Aynur Hümbətova, Elay Xasıyev, Akif Mirzəyev və Siyavuş Mahmudov çıxış edirlər. //Azərtac