Sumqayıt şəhərində 82 yaşlı kişini qətlə yetirməkdə ittiham olunan Samir Abbasovun barəsindəki qərardan verlən kassasiya şikayəti üzrə məhkəmə iclası başa çatıb.
 
Sumqayit.tv-in əldə etdiyi məlumata görə, Ali Məhkəmənin hakimi Tahir Kazımovun sədrliyi ilə keçirilən prosesdə qərar elan olunub.
 
Qərara əsasən, kassasiya şikayəti qismən təmin edilməyib, məhkum barəsində Sumqayıt Apellyasiya Məhkəməsinin qərarı dəyişdirilib. Belə ki, Sumqayıt Apellyasiya Məhkəməsinin qərarından və onunla bağlı Sumqayıt Ağır Cinayətlər Məhkəməsinin hökmündən “zərərçəkmiş şəxs təvəllüdü 1941-ci il olduğundan 61.1.7-ci maddəsinə əsasən məsuliyyətini ağırlaşdıran hal” kimi nəzərə alınmasına dair müddəalar xaric edilib. Samir Abbasovun cəzası 16 ildən 15 il 9 aya endirilib.
 
İttihama görə, taxta ustası olan S.Abbasov Nadir Rzayevin tikdirdiyi fərdi yaşayış evində mərtəbələrarası pilləkən hazırlanması sifarişini götürüb və işə başlayıb.
 
Lakin tərəflər arasında ödənişlə bağlı bir neçə dəfə mübahisə yaranıb. Ötən il avqustun 17-də usta ilə ev sahibi arasında yenidən narazılıq baş verib. S.Abbasov 81 yaşlı ev sahibinin başından taxta parçası ilə zərbə endirib. Ev sahibi müvazinətini itirərək yerə yıxılıb. Usta ahıl kişini köməksiz vəziyyətdə qoyaraq qapını kilidləyib və hadisə yerindən uzaqlaşıb.
 
Ertəsi gün onun  ölüb-ölmədihyini müəyyənləşdirmək üçün yenidən həmin ünvana gəlib. O, ev sahibinin öldüyünü görüb cinayətin izini itirmək məqsədilə meyiti sürüyərək çölə çıxarıb, həyətdəki yardımçı tikilidə basdırıb.
 
Mərhum N.Rzayevin yaxınlarının ondan xəbər ala bilməməsindən sonra polisə müraciət edilib. O, itkin şəxs kimi axtarılarkən evində usta tərəfindən öldürülməsi və həyətdə basdırılması məlum olub. Qətlə yetirildikdən təxminən 20 gün sonra N.Rzayevin basdırıldığı yer tapılıb.
 
Törətdiyi cinayət əməlinə görə, S.Abbasova qarşı Cinayət Məcəlləsinin 120.2.9-cu (köməksiz vəziyyətdə olan şəxsi öldürmə) maddəsi ilə ittiham irəli sürülüb.
 
Sumqayıt Ağır Cinayətlər Məhkəməsinin hökmü ilə S.Abbasov cəzasını ciddi rejimli cəzaçəkmə müəssisəsində çəkməklə 16 il müddətinə azadlıqdan məhrum edilmişdi. Sumqayıt Apellyasiya Məhkəməsi şikayəti təmin etməmişdi. //Pravda.az