Sumqayıt şəhərinin Köhnə Corat qəsəbəsində yaşayan sakinlər, bir ildən artıqdır ki, kanalizasiya sisteminin bərbad vəziyyətdə olduğunu və bunun gündəlik həyatlarını ciddi şəkildə çətinləşdirdiyini bildirirlər.
Bu barədə Sumqayit.tv-yə qəsəbə Corat sakini ərazinin yaşayışçıları adından video müraciət ünvanlayıb. Bildirilir ki, qəsəbə sakinləri, xüsusilə də Nərman Nərmanov küçəsindəki evlərin kanalizasiya sisteminin pozulmasından əziyyət çəkdiklər. İddiaya görə bu problemlər nəticəsində, evlərdə pis qoxular yayılmağa başlayıb, divarlar su ilə dolub və ərazidə yaşayanlar evlərində üfunətdən yata bilmirlər.

Sakinlərin dediklərinə görə, Corat qəsəbəsi üzrə sözügedən problemlə məşğul olan qurumlara müraciət etdiklərini, lakin, bu qurumların problemə həll yolu tapmaq əvəzinə yalnız "gəlib baxacağıq" cavabını verdiklərini bildirirlər. Lakin bu vədlərə baxmayaraq bu günə qədər heç kim gələyib.

Artıq havalar istiləşir bir çox ailə, xüsusən kiçik uşaqları olan ailələr, evlərindəki pəncərələri aça bilmir, çünki pis qoxu və yüksək rütubət evlərə yayılmaqdadır. "Evimizin divarları su ilə dolub, evin abadlığı tamamilə pozulub. Hər gün bu pis vəziyyəti yaşamaq bizə çox çətindir." – deyə, qəsəbə sakinləri müraciətdə bildirir.

Sakinlər həmçinin, Sovet dövründən bəri bu problemlə mübarizə apardıqlarını, lakin vəziyyətin getdikcə daha da pisləşdiyini vurğulayıblar.

Köhnə Corat qəsəbəsindəki kanalizasiya probleminin, sakinlərin gündəlik həyatını çətinləşdirən ciddi bir məsələyə çevrildiyini nəzərə alaraq, yerli idarəetmə və əlaqədar qurumların bu məsələyə biganə qalmayacağı qənaətindəyik.

1-04-2025, 20:33 153