Sumqayıt şəhərində fəaliyyət göstərən “Sevgilim” şadlıq sarayının xidmətlərindən toy sahibləri şikayət ediblər.

Sumqayit.tv xəbər verir ki, onların sözlərinə görə, sifariş verdikləri menyu və xidmət göstərilən standartlar arasında böyük fərq olub və bunun nəticəsində onlar özlərinin aldadıldığını iddia edirlər.

Toy sahibi bildirib ki, 25 may 2025-ci il tarixində şadlıq sarayında 40 manatlıq menyu sifariş olunub. Lakin, xidmət zamanı menyuya daxil olan yeməklər qonaq sayına uyğun verilməyib. Xidmətçilərdən yemək tələb etdikdə isə uzun müddət cavab ala bilməyiblər. Administratorun verdiyi sözlər isə reallıqda təsdiqlənməyib.

Müştəri əlavə edib ki, yeməklərin keyfiyyəti və miqdarı qənaətbəxş olmayıb, məsələn, kabab yalnız bir neçə tikə təqdim olunub, hətta suyun belə vaxtında gətirilməməsi müşahidə olunub. Həmçinin, tort və digər şirniyyatlar qonaqlara kifayət qədər təqdim edilməyib, müdiriyyət tərəfindən məhdudiyyətlər qoyulub.

Toy sahibləri həmçinin bildirir ki, əvvəlcədən razılaşdırılan əlavə xidmətlər, yəni 50 manatlıq xınayaxdı, davul və 30 manatlıq albom onlar üçün hədiyyə adı altında təqdim ediləcəkmiş, amma reallıqda bu vədlər yerinə yetirilməyib.

Məsələ ilə bağlı ekspertlər şadlıq sarayları ilə bağlı diqqətli olmağa və toy təşkil edənlərin xidmət şərtlərini yazılı şəkildə təsdiqləmələrinin vacib olduğunu vurğulayırlar. //Milli.az