Sumqayıt şəhərində ictimai iştirakçılığın gücləndirilməsi və yerli idarəetmədə sakinlərin rolunun artırılması istiqamətində tədbirlər davam etdirilir. Bu məqsədlə Sumqayıt Bələdiyyəsinin sədri Adil Xudadatov şəhər sakinləri ilə növbəti açıq formatlı görüş keçirib.
Görüş zamanı vətəndaşlar birbaşa müraciət edərək yaşadıqları ərazilərdə mövcud olan sosial və infrastruktur problemləri, eləcə də müxtəlif təklif və təşəbbüslərlə çıxış ediblər. Sakinlərin qaldırdığı məsələlər əsasən məhəllədaxili yolların təmiri, yaşıllaşdırma və abadlıq işlərinin gücləndirilməsi, uşaq meydançalarının salınması, məişət tullantılarının vaxtında daşınması və digər gündəlik sosial məsələlərlə bağlı olub.
Bələdiyyə sədri Adil Xudadatov görüş zamanı bildirib ki, bu cür açıq görüşlər şəffaf və insan yönümlü idarəçilik modelinə əsaslanır və gələcəkdə də davam etdiriləcək. Onun sözlərinə görə, sakinlərin səsləndirdiyi fikirlər, təkliflər və şikayətlər nəzərə alınır və imkan daxilində operativ şəkildə həll olunur:

“Sakinlərin fikirləri bizim üçün çox önəmlidir. Hər bir təklif gələcək planlamalarda nəzərə alınacaq. Bu, nəticəyə yönəlik yeni bir yanaşmadır.”
Görüşdə səsləndirilən bəzi məsələlərin operativ həlli üçün yerindəcə müvafiq tapşırıqlar verilib. Şəhər sakinləri bu formatda keçirilən qəbuldan razılıq ifadə edərək bildiriblər ki, bu cür görüşlər bir tərəfdən onların səsini birbaşa qərarverici şəxslərə çatdırmaq imkanı yaradır, digər tərəfdən isə problemlərin həllini sürətləndirir.
Qeyd edək ki, Sumqayıt Bələdiyyəsi tərəfindən təşkil edilən bu cür görüşlər yerli özünüidarəetmə orqanları ilə vətəndaşlar arasında əməkdaşlığın daha da möhkəmlənməsinə xidmət edir və şəhərin daha yaşanılan mühitə çevrilməsinə töhfə verir.