Sosial şəbəkələrdə Sumqayıt şəhəri, 1-ci mikrorayon ərazisində qanunsuz yeni obyekt qurulmasıyla bağlı iddialar yer alan videogörüntülər yayılıb.

Sumqayıt İcra Hakimiyyətindən Axar.az-a verilən açıqlamada bildirilir ki, qeyd olunan ərazidə illər öncə quraşdırılmış köşk olub.

“Bu köşklə bağlı müvafiq sənədlər mövcuddur. Hazırda həmin köşk müasir tələblərə uyğun şəkildə yenilənərək yüngül konstruksiya əsasında quraşdırılıb”, - məlumatda bildirilib.

Videodan görünür ki, köşk müasir tələblərə uyğun yenilənərkən, ağac da məhv edilib. Bu isə genişlənmə və ərazi zəbt edildiyi iddialarını ortaya çıxarıb.

Ekologiya və Təbii Sərvətlər nazirliyindən sorğumuza cavab olaraq bildirilib ki, Sumqayıt şəhəri, 1-ci mikrorayon, Sülh küçəsində ağacların kəsilməsi ilə bağlı mediadan daxil olan məlumat əsasında Dövlət Ekoloji Təhlükəsizlik Xidmətinin 4 saylı Regional Ekologiya və Təbii Sərvətlər İdarəsinin əməkdaşları tərəfindən araşdırma aparılıb:

“Araşdırma zamanı sözügedən əraziyə yüngül metal konstruksiyalı köşkün yerləşdirilməsi zamanı vətəndaş Elgün Orucov tərəfindən bir ağacın kəsildiyi, iki ağacın isə zədələndiyi müəyyən edilib. Faktla bağlı akt, protokol tərtib olunaraq E.Orucova 3700 manat məbləğində cərimə və ziyan tətbiq edilib. Eyni zamanda, metal konstruksiyanın qanunsuz qurulması ilə bağlı müvafiq qurumlara müraciət olunub.

Yaşıllıqların mühafizəsinə həssas münasibət göstərən ictimaiyyət və media nümayəndələrinə göstərdikləri vətəndaşlıq mövqeyinə görə təşəkkür edir, eyni zamanda vətəndaşlardan xahiş edirik ki, yaşıllıqlara zərər vurulması halları ilə rastlaşdıqda Ekologiya və Təbii Sərvətlər Nazirliyinin “168 Çağrı Mərkəzi”nə müraciət etsinlər”.

13-11-2025, 11:15 99