Sumqayıt şəhərində fəaliyyət göstərən 7 nömrəli marşrut avtobusunun sürücüsünün sərnişinlərin həyatını təhlükəyə atması ilə bağlı görüntü araşdırılıb, sürücü barədə müvafiq tədbir görmək tapşırığı verilib və həmin şəxs artıq işdən azad olunub.
Sumqayit.tv xəbər verir ki, bu barədə Oxu.az-ın sorğusuna cavab olaraq Azərbaycan Yerüstü Nəqliyyat Agentliyindən (AYNA) bildirilib.
Məlumatda qeyd olunub ki, avtobus sürücülərinin işə qəbulu daşıyıcılar tərəfindən həyata keçirilir:
"Daşıyıcılarla keçirilən görüşlərdə mütəmadi olaraq onlara müvafiq tapşırıqlar verilir. AYNA tərəfindən Sumqayıt şəhərində marşrut avtobuslarının sürücüləri ilə bağlı mütəmadi monitorinqlər aparılır. Hər hansı nöqsanlar aşkarlandığı təqdirdə müvafiq tədbirlər görülür. Daxil olan bütün müraciətlər də ətraflı araşdırılır".
***
Sumqayıt şəhərində 7 saylı marşrut xətti ilə hərəkət edən sərnişin avtobusu sürücüsünün nəqliyyat vasitəsini idarə edən zaman sərnişinlərin həyatını təhlükəyə ataraq mobil telefondan istifadə etməsi və sosial şəbəkəyə daxil olması barədə yayılan görüntülər araşdırılıb.
Sumqayit.tv-in məlumatına görə, bu barədə Oxu.az-ın sorğusuna cavab olaraq Baş Dövlət Yol Polisi İdarəsindən bildirilib.
Qeyd olunub ki, sürücü N.Əlişanov müəyyən olunaraq Sumqayıt Şəhər Dövlət Yol Polisi Şöbəsinə dəvət edilib:
"Onun barəsində inzibati protokol tərtib edilib və sürücü ilə profilaktik söhbət aparılıb".
5-03-2026, 14:19
58
