Mingəçevir Dövlət Universitetində (MDU) “Velo Park – Sağlam Gənclik, Yaşıl Kampus” layihəsinin təqdimat mərasimi keçirilib.
Sumqayit.tv xəbər verir ki, layihə universitetin “2030 İnkişaf Strategiyası” və “Yaşıl Kampus” konsepsiyasına uyğun olaraq həyata keçirilir.
Tədbirdə gənclər və idman naziri Fərid Qayıbov, Azərbaycan Velosiped İdmanı Federasiyasının (AzVİF) vitse-prezidenti Fikrət Hüseynov, Yeni Azərbaycan Partiyasının Mingəçevir şəhər təşkilatının sədri Bəxtiyar Mustafayev, Mərkəzi Aran Regional Gənclər və İdman İdarəsinin rəhbəri Azad Gözəlov, şəhər təhsil sektorunun nümayəndələri, MDU-nun akademik-inzibati heyəti, tələbələr, magistrantlar, ümumtəhsil məktəblərinin direktorları və media nümayəndələri iştirak ediblər.
Gənclər və İdman Nazirliyinin təşkilatçılığı və Azərbaycan Velosiped İdmanı Federasiyasının tərəfdaşlığı ilə reallaşdırılan layihə çərçivəsində universitetə 70 velosiped təqdim olunub. Velosipedlər sentyabr ayından start götürmüş seçim turlarında fəallıq göstərən 70 qız tələbəyə hədiyyə edilib.
Layihə müddətində tələbələr maarifləndirici təlimlərdə, velosürmə kurslarında və müxtəlif turlarda iştirak edərək öz bacarıqlarını təkmilləşdiriblər.
MDU-dan bildirilib ki, layihənin əsas məqsədi tələbələri fiziki aktivliyə cəlb etmək, sağlam həyat tərzini təşviq etmək, gender bərabərliyini dəstəkləmək və kampusda ekoloji şüuru gücləndirməkdir.
Universitet rəhbərliyi layihəyə verdiyi dəstəyə görə Gənclər və İdman Nazirliyinə, AzVİF-ə və prosesdə əməyi keçən hər kəsə təşəkkür edib.
Qurumdan həmçinin qeyd edilib ki, beynəlxalq təcrübəyə əsaslanaraq MDU-da region səviyyəsində davamlı veloinfrastrukturun qurulmasına başlanılıb. “Velo Park” layihəsi universitetdə sağlam, yaşıl və aktiv kampus hərəkatının yeni mərhələsi kimi qiymətləndirilir.
VİDEO LİNK: Sumqayıt TV Official (@sumqayittvofficial) | TikTok
17-11-2025, 10:49
241
