Sumqayıt Dövlət Universiteti növbəti məzunlarını təntənəli şəkildə yola salıb. İyunun 30-da universitetin əsas tədris binasının qarşısında keçirilən “Məzun günü” mərasimi ali təhsil həyatını başa vuran gənclər üçün əlamətdar hadisə olub.
Tədbirdə Sumqayıt Şəhər İcra Hakimiyyəti başçısının birinci müavini Teymur Səmədov, Milli Məclisin komitə sədrləri Anar İsgəndərov və Fazil Mustafa, Dövlət Məşğulluq Agentliyinin İdarə Heyətinin sədri Hasil Abbasov, Parlament Jurnalistlər Birliyinin sədri Elşad Eyvazlı, professor-müəllim heyəti, tərəfdaş qurumların nümayəndələri, məzunlar və onların valideynləri iştirak ediblər.
Ənənəyə uyğun olaraq iştirakçılar əvvəlcə Ümummilli Lider Heydər Əliyevin büstü önünə və Vətən uğrunda canından keçmiş SDU məzunlarının xatirəsinə ucaldılmış abidə kompleksinə gül dəstələri qoyaraq ehtiramlarını bildiriblər. Azərbaycan Respublikasının Dövlət Himninin səsləndirilməsi ilə başlayan mərasimdə Ümummilli Lider Heydər Əliyevin və Azərbaycanın ərazi bütövlüyü uğrunda şəhid olmuş qəhrəmanların xatirəsi bir dəqiqəlik sükutla yad edilib.
Mərasimdə çıxış edən universitetin rektoru, professor Nurəli Yusifbəyli məzunları qazandıqları bilik və bacarıqları ölkənin inkişafına, elmə, innovasiyalara və cəmiyyətin tərəqqisinə töhfə vermək üçün istifadə etməyə çağırıb. O bildirib ki, SDU məzunları müasir əmək bazarının tələblərinə cavab verən peşəkar hazırlıq, yüksək mənəvi dəyərlər və vətəndaş məsuliyyəti ilə yeni həyat mərhələsinə qədəm qoyurlar.
Rektor vurğulayıb ki, universitetin əsas prioritetləri keyfiyyətli təhsil mühitinin formalaşdırılması, elmi-tədqiqat fəaliyyətinin genişləndirilməsi və əmək bazarı ilə sıx inteqrasiyanın təmin edilməsidir.
1-07-2026, 16:50
56
