2026–2027-ci tədris ili üzrə məktəbəqədər təhsil müəssisələrinə elektron qəbul gələn həftədən başlayacaq.
Məktəbəqədər və Ümumi Təhsil üzrə Dövlət Agentliyindən verilən məlumata görə, iyulun 7-si saat 11:00-dan Regional Təhsil İdarələri və Naxçıvan Muxtar Respublikasının tabeliyində olan məktəbəqədər təhsil müəssisələrinə qəbul üçün elektron növbələrin yaradılmasına start veriləcək.
Bakı şəhərində fəaliyyət göstərən məktəbəqədər təhsil müəssisələri üzrə isə elektron növbələrin yaradılması iyulun 9-u saat 11:00-da başlayacaq.
Bildirilib ki, 2021 və 2022-ci il təvəllüdlü uşaqlar üçün növbələr saat 11:00-da, 2023, 2024 və 2025-ci il təvəllüdlü uşaqlar üçün isə saat 15:00-da aktiv olacaq.
Bu il qəbul prosesi ilk dəfə olaraq "myGov" platforması üzərindən həyata keçiriləcək. Valideynlər və ya qanuni nümayəndələr "myGov" kabinetində "Xidmətlər" bölməsindən Elm və Təhsil Nazirliyinin "Məktəbəqədər təhsil müəssisələrinə qəbul" xidmətini seçərək elektron müraciət edə biləcəklər.
Qəbul sistemi vasitəsilə bir uşaq üçün maksimum üç məktəbəqədər təhsil müəssisəsi seçmək mümkündür. Yaradılmış növbə boş yer olduğu halda minimum beş gündən sonra sorğuya çevriləcək. Sorğu yaradıldıqdan sonra valideyn yeddi gün ərzində tələb olunan sənədləri müvafiq bağçaya təqdim etməlidir. Əks halda sorğu ləğv ediləcək və növbə digər uşağa keçəcək.
Qeyd olunub ki, ötən tədris ilində yaradılmış bütün növbə və sorğular arxivləşdirilib və 2026–2027-ci tədris ili üzrə qəbul prosesində etibarlı hesab edilməyəcək.
Bu gün, 19:20
8
