Ukrayna xarici işlər naziri Dmitri Kuleba Rusiya ilə müharibənin başlamasının birinci ildönümündə - fevralın 24-də böyük hadisələrin gözlənildiyini açıqlayıb.
Teleqraf.com xəbər verir ki, nazir yaxın günlərdə ciddi qərarların veriləcəyini deyib.
“Çox vacib siyasi siqnallar, sanksiyalar, silahlarla bağlı qərarlar, birlik mesajları olacaq və bu, bütün səviyyələrdə baş verəcək. Yəni Rusiya Ukraynaya qarşı genişmiqyaslı təcavüzünün bir illiyini dünyanın necə qeyd edəcəyini xatırlayacaq”, - Kuleba bildirib.
Ukrayna Prezidenti Vladimir Zelenski BMT Baş Assambleyasının sessiyasında çıxış etmək üçün fevralın 24-də Nyu-Yorka (ABŞ) getməyi planlaşdırır.
“Blumberq” agentliyinin məlumatına görə, G7 ölkələri fevralın 24-də sanksiyalardan yayınaraq Rusiyaya kömək etdiklərinə görə Çin, İran və Şimali Koreyaya sanksiyalar tətbiq edə bilər.