“Vaqner” ÖHŞ-nin sahibi Yevgeni Priqojin etiraf edib ki, o, uzun müddət “trol fabriki” kimi tanınan İnternet Araşdırmaları Agentliyini yaradıb və idarə edib…

Poliqon.info xəbər verir ki, bu barədə rusiyalı viznesmen Almaniyanın Der Spiegel nəşrinə deyib. Priqojinin sözlərinə görə, o, Rusiya informasiya məkanını Qərbdən gələn anti-Rusiya tezislərinin bayağı aqressiv təbliğatından qorumaq üçün “trol fabriki” yaradıb.
“Mən heç vaxt İnternet Araşdırmaları Agentliyinin adi maliyyəçisi olmamışam. Mən bu agentliyi yaratmışam, uzun müddət də idarə etmişəm”, deyə Priqojin Der Spiegel-in və digər Qərb nəşrlərindən olan bir qrup jurnalistin sualına cavab olaraq bildirib.
Bundan əlavə, Yevgeni Priqojin etiraf edib ki, o, “Kiberfront Z”dən olan bloqçuların işləməsi üçün binalar onlara verib. İş adamının sözlərinə görə, o, əvvəlcə onlara “mümkün maliyyə yardımı” təklif edib: “Təəssüf ki, imtina etdilər, amma boş ofislərim olduğu üçün qərargah kimi onlara hədiyyə etməkdən məmnun oldum”, deyə Priqojin sözlərini davam etdirib.
Der Spiegel “Kiberfront Z”ni Ukraynada hərbi əməliyyatlar başlayandan bəri fəaliyyət göstərən "yeni trol ordusu" adlandırıblar. Bəzi məlumatlara görə, “Kiberfront”un üzvləri Yevgeni Priqojinin barında toplaşırlar.
ABŞ hakimiyyəti Priqojinin “trol fabriki”ni 2016-cı ildə keçirilən prezident seçkilərinə müdaxilədə ittiham edib. ABŞ səlahiyyətlilərinə görə, İnternet Araşdırmaları Agentliyi saxta sosial media hesabları yaradıb, bu hesablar vasitəsilə təbliğat, dezinformasiya yayıb, həmçinin ictimai rəyi manipulyasiya etməyə çalışıb. ABŞ kəşfiyyatı hələ o vaxt Yevgeni Priqojini “trol fabriki”nin yaradıcısı və rəhbəri adlandırırdılar.
Poliqon.info