Ultra emal olunmuş qidaların tez-tez istehlakı ürək-damar xəstəlikləri riskini ciddi şəkildə artıra bilər.

Sumqayit.tv Report-a istinadən xəbər verir ki, araşdırmaya görə çips, kolbasa, şəkərli içkilər, fast food, hazır yeməklər və paketlənmiş səhər yeməkləri kimi məhsullar bu qrupa daxildir.

Tədqiqat nəticələrinə əsasən, bu qidaları gündə doqquz porsiyadan çox istehlak edən insanların ürək tutması, insult və ya ürək-damar xəstəliklərindən ölüm riski nadir hallarda istifadə edənlərlə müqayisədə 67 faiz daha yüksəkdir.

Araşdırmada başlanğıc mərhələdə ürək xəstəliyi olmayan, yaşı 45-84 arasında olan 6800-dən çox insan iştirak edib. Alimlər iştirakçıların sağlamlıq vəziyyətini uzun müddət izləyib və anketlər vasitəsilə onların qidalanma vərdişlərini təhlil ediblər.

Məlum olub ki, risk tədricən artır və gündə hər əlavə porsiya mənfi nəticə ehtimalını təxminən 5 faiz yüksəldir. Bu təsir kalori qəbulu, pəhrizin keyfiyyəti, piylənmə, diabet və yüksək təzyiq kimi amillər nəzərə alındıqdan sonra da qalır.

Mütəxəssislər hesab edir ki, risk təkcə kalori ilə deyil, qidanın emal səviyyəsi ilə də bağlıdır. Əvvəlki araşdırmalar göstərir ki, ultra emal olunmuş qidalar orqanizmdə iltihab proseslərini artırır, daxili yağlanmanı gücləndirir və metabolik pozğunluqlara səbəb olur ki, bu da ürək-damar xəstəliklərinin əsas risk faktorları sayılır.

23-03-2026, 10:36 25