Sürətli urbanizasiya və paytaxtətrafı qəsəbələrin genişlənməsi səbəbindən Bakı şəhərində nəqliyyat sıxlığı getdikcə artır. Xüsusilə M1, M3 və digər magistrallardan gələn sürücülər alternativ yollar olmadığı üçün məcburən şəhər mərkəzinə daxil olur və bu da əsas yollarda ciddi tıxac yaradır.

Azərbaycan Yerüstü Nəqliyyat Agentliyi bildirir ki, bu problemi azaltmaq üçün Dövlət Proqramı çərçivəsində 3 böyük yol layihəsi həyata keçirilir. Bu layihələrdən biri Bilgəh–Novxanı–Xırdalan–M4 avtomobil yolu olacaq. Yeni yol Abşeron yarımadasının şimal-şərq hissəsini şəhər mərkəzinə daxil olmadan birbaşa magistrallara birləşdirəcək.

Bu layihə xüsusilə Sumqayıt və Xırdalan istiqamətindən gələn sürücülər üçün alternativ marşrut yaradacaq. Yol istifadəyə verildikdən sonra nəqliyyat axını “20 Yanvar” dairəsi və Bakı-Sumqayıt şosesinə daxil olmadan digər istiqamətlərə yönləndirilə biləcək.

Digər layihələrə Sabunçu–Sulutəpə dairəvi yolu və Bakı Dairəvi-1 avtomobil yolu ilə Ziya Bünyadov prospektini birləşdirən yeni bağlantı daxildir. Bu yollar tamamlandıqdan sonra şəhər mərkəzinə daxil olmadan müxtəlif istiqamətlərə hərəkət mümkün olacaq.

Qeyd edək ki, artıq Bilgəh–M4 yolunun tikintisi davam edir və magistralın 2027-ci ildə istifadəyə verilməsi planlaşdırılır. Layihənin ümumi uzunluğu təxminən 29 kilometr, eni isə 6 zolaq olacaq.

Mütəxəssislərin fikrincə, bu yol istifadəyə verildikdən sonra Bakı ilə yanaşı Sumqayıt istiqamətində də nəqliyyat sıxlığı əhəmiyyətli dərəcədə azalacaq. 

23-03-2026, 19:32 31