Sumqayıtda sərnişin avtobusunun təhlükəli manevr etməsinin səbəbi məlum olub.

BakuBus MMC-nin mətbuat katibi Əsmər Əliyeva məsələ ilə bağlı Oxu.az-a açıqlamasında bildirib ki, 500 nömrəli müntəzəm marşrut xətti üzrə hərəkətdə olan avtobusun qarşısındakı nəqliyyat vasitəsi qəfil dayandığı üçün toqquşma riski yaranıb.

Onun sözlərinə görə, martın 22-də Sumqayıt Avtovağzalı istiqamətində hərəkətdə olan, “BakuBus” MMC-yə məxsus 500 nömrəli marşrut avtobusu qəza şəraiti ilə üzləşib. İlkin araşdırma zamanı müəyyən edilib ki, avtobusun qarşısında olan avtomobil qəfil dayandığından sürücü toqquşmanın qarşısını almaq üçün məcburi manevr edib.

Bildirilib ki, sürücü sərnişinlərin təhlükəsizliyini təmin etmək məqsədilə etdiyi bu manevr nəticəsində yol hərəkətinin digər iştirakçıları üçün qısamüddətli maneə yaranıb.

Hadisə ilə bağlı şirkət tərəfindən xidməti araşdırma aparılıb, sürücünün izahatı alınıb, onunla profilaktik söhbət keçirilib və peşəkar bacarıqlarının artırılması üçün əlavə təlimlərə cəlb olunub.

24-03-2026, 12:18 33