Azərbaycan futbolunda diqqətçəkən təyinat baş tutub. Vaxtilə Sumqayıt FK-nın əsas komandasını çalışdıran Vaqif Cavadov artıq Azərbaycanın U-20 millisində köməkçi məşqçi vəzifəsinə gətirilib. Bu barədə AFFA məlumat yayıb.

Sumqayit.tv xəbər verir ki, o U-20 yığmasında portuqaliyalı mütəxəssis Ruy Jorge-nin köməkçisi kimi fəaliyyət göstərəcək.

Məşqçilik karyerasına məhz Sumqayıtda başlayan Cavadov əvvəlcə klubun U-19 komandasında köməkçi məşqçi olub, daha sonra Sumqayıt-2-nin baş məşqçisi kimi çalışıb. 2024/2025 mövsümünün ikinci yarısında isə “Sumqayıt”ın əsas komandasına rəhbərlik edib.

Qeyd edək ki, Vaqif Cavadov futbolçu kimi də zəngin karyeraya malik olub. O, Azərbaycanda bir sıra klublarda çıxış edib, həmçinin legioner həyatı yaşayıb. 2006–2014-cü illərdə Azərbaycan millisinin formasını geyinən sabiq hücumçu 58 oyunda 9 qol vurub.

Xatırladaq ki, U-20 millimiz 2027-ci ildə keçiriləcək FIFA U-20 World Cup 2027 turnirinə hazırlaşır.

1-04-2026, 14:25 73