Bakıda özəl İdrak Liseyində müəllimi güllələməkdə təqsirləndirilən yeniyetmə ilə bağlı cinayət işi üzrə məhkəmə istintaqına başlanılıb.

Sumqayit.tv xəbər verir ki, Bakı Ağır Cinayətlər Məhkəməsində hakim Vüqar Quliyevin sədrliyi ilə keçirilən prosesdə prokuror ittiham aktını elan edib.

İttihama görə, müəllim Şəhla Kamilova şagirdə dərsi bilmədiyi üçün irad bildirib. Yeniyetmə bunu özünə hörmətsizlik kimi qəbul edib. Bildirilir ki, o, atası tərəfindən evdə gizlədilən ov tüfəngini və patron darağını götürərək çantasında liseyə gətirib. Gözətçinin çantaları yoxlamaması səbəbindən silahla məktəbə daxil olan şagird müəllimin olduğu otaqda atəş açaraq hadisə yerini tərk edib.

Məhkəmədə ifadə verən yeniyetmə özünü qismən təqsirli bildiyini, müəllimi öldürmək niyyətinin olmadığını deyib. Növbəti məhkəmə iclası iyulun 24-nə təyin edilib.

Qeyd edək ki, hadisə 2026-cı il fevralın 6-da Bakının Binəqədi rayonunda yerləşən özəl "İdrak" liseyində baş verib. Faktla bağlı Binəqədi Rayon Prokurorluğunda cinayət işi başlanılıb və təqsirləndirilən şəxsə Azərbaycan Respublikasının Cinayət Məcəlləsinin 29 və 120.2.2-ci (xuliqanlıq niyyəti ilə adam öldürməyə cəhd) maddələri ilə yekun ittiham elan olunub.

Bu gün, 13:13 42