Xəbər verdiyimiz kimi bir müddət öncə Sumqayıt Dövlət Dram Teatrında maaşların verilməməsi ilə bağlı iddialar yayılıb.

Bu barədə sosial şəbəkələrdə və bəzi kütləvi informasiya orqanlarında məlumatlar paylaşılıb. Məsələni cəmiyyət çox həssas qarşıladığı üçün Sumqayit.tv olaraq problemlə bağlı son durumu araşdırdıq. Həmsöhbət olduğumuz Sumqayıt Dövlət Dram Teatrının aktyoru, Əməkdar artist Rauf Ağakişiyev sevindirici xəbər  verdi: “Biz noyabrın ilk günlərində oktyabr ayının maaşını aldıq. Biz hər ay məvacib alırıq. Sadəcə, 5-10 gün gecikmə olanda banka ödədiyimiz kreditin üstünə faiz gəlir. İnanın, elə olur, öz yeməyimizdən kəsib kredit ödəyirik. Gecikəndə isə problem bir az da qəlizləşir. Biz də aktyor adamlarıq, yalnız maaşa bağlıyıq. Sağ olsun, dövlət səsimizə səs verdi, maaşımızı aldıq. Hazırda işləyirik, işimizin başındayıq. Sənətimizi inkişaf etdirməkdən zövq alırıq. Öz sənətimizlə məşğul oluruq, xalqa, dövlətə xidmət edirik”.