Bu gün (red-dünən) Azərbaycan Silahlı Qüvvələrinin əsgəri Vətən müharibəsi şəhidi Əliyev Sərxan İslam oğlunun mövlud günüdür.
Sumqayit.tv xəbər verir ki, şəhidimizin mövlud mərasimi Şəhidlər Xiyabanında məzarını ziyarət edilərək başlayıb, Heydər Əliyev Mərkəzində mövlud tədbiri keçirilib, daha sonra isə xeyir-şər evində ehsan süfrəsi verilərək davam edib. Tədbirdə vətənimizin azadlığı uğrunda canlarından keçən bütün şəhidlərin əziz xatirəsi bir dəqiqəlik sükutla yad edilib, daha sonra vətənpərvər mahnılar ifa edilib, şeirlər səsləndirilib. Məclisdə yazıçılar, şairlər, Corat qəsəbə Məscidinin axundu Hacı Sahib Məmmədov, Sumqayıt Cümə Məscidinin axundu Hacı Rauf Sərdərov, 10 nömrəli, şəhidimizin təhsil aldığı 13 nömrəli məktəbin və "Təfəkkür" liseyinin müəllim və sagird kollektivi,  qohumlar və şəhid ailələri iştirak ediblər.
Xatırladaq ki, Sərxan Əliyev 16.01.1998-cu ildə Sumqayıt şəhərində anadan olub. Sərxan Əliyev Azərbaycan Respublikasının ərazi bütövlüyü uğrunda 27.09.2020-ci il tarixdən başlayan Vətən müharibəsi zaman könüllü olaraq döyüşlərə qatılıb və torpaqlarımızın işğaldan azad olunmasında igidlik göstərərək Füzuli istiqamətində gedən döyüşlərdə qəhrəmancasına şəhid olmuşdur. Azərbaycan Prezidenti İlham Əliyevin Sərəncamına əsasən şəhidimiz "Vətən uğrunda" və "Füzulinin azad olunmasına görə" medalları ilə təltif edilib. 
Dəyişilməyən yaşın mübarək olsun, nur üzlü Şəhidim! 

Vəsiqə DADAŞOVA