Bakı-Sumqayıt qatarından gündəlik 30.000-dən çox insan istifadə edir. İstər səhərlər, istərsə də axşamlar qatarlardakı sıxlıq yoldakı tıxaclardan fərqlənmir. Bəs bunun həll yolu kimi ADY nə etməyi düşünür, hərəkət cədvəlində dəyişiklik ya əlavə reyslərin artırılması?
Məsələ ilə bağlı "Azərbaycan Dəmir Yolları" ilə əlaqə saxladıq.
Qurumun sözçüsü Sənubər Nəzərova bildirib ki, ADY-nin sərnişin hərəkət vasitələri parkında 9 ədəd 2 mərtəbəli sürətli sərnişin qatarı istismardadır. Qatarlar Bakı-Abşeron dairəvi, Bakı-Ağstafa-Bakı və Bakl-Qəbələ-Bakı istiqamətlərində hərəkət edir.
"Bakı-Abşeron dairəvi üzrə sürətli qatarlarla gündəlik 30 mindən çox sərnişin daşınır. ADY 2023-cü ilin dekabrında ilin rekord həddə 7 milyonuncu sərnişini daşıyıb. Bu o deməkdir ki, sərnişinlər mənzil başına daha rahat və vaxtında, ən əsası təhlükəsiz çatmaq üçün ADY-yə məxsus qatarlara getdikcə daha çox üstünlük verirlər.
ADY və ‘’Stadler Rail Group’’ arasında imzalanmış müqaviləyə əsasən sifariş edilmiş 10 yeni sərnişin qatarından 4-ü Bakıya çatdırılıb. Bu qatarlardan ikisi 2024-cü ilin yazında istismara veriləcək. Yeni qatarlarla Bakı-Abşeron Dairəvidə daha çox sərnişin daşımaq və ictimai nəqliyyatın üzərinə düşən yükün əhəmiyyətli dərəcəsinin qarşılamaq mümkün olacaq".
AYSEL ƏKBƏR