Bu gün (red-dünən) 27.09.2020-ci il tarixində başlayan Vətən müharibəsi zamanı şəhid, Azərbaycan Silahlı Qüvvələri "Su Altı Hücum" (SAH) Xüsusi Təyinatlıların  giziri, Ələsgərli Zaur Mübariz oğlunun şəhadətə ucaldığı gündür. 
Sumqayit.tv xəbər verir ki, şəhidimiz Ələsgərli Zaurun anım mərasimi Şəhidlər Xiyabanında məzarını ziyarət edilərək başlayıb, sonra isə mərasim evlərinin birində ehsan süfrəsi verilərək davam edib. Məclisdə Zeynalabdin Tağıyev qəsəbəsinin bələdiyyəsi Lalə xanım və kollektivi, "Mənim oğlum qəhrəmandır" layihəsinin rəhbəri Cəlal Qurbanov, 12 nomrəli məktəbin şagirdləri, döyüş yoldaşları, qohumları və şəhid ailələri iştirak ediblər.

Xatırladaq ki, Zaur Ələsgərli 05.03.1995-ci ildə Sumqayıt şəhərində Mübariz və Vəfa Ələsgərlilərin ailəsində anadan olub. 2001-2004-cü illərdə Sumqayıt şəhərində 13 nömrəli tam orta məktəbdə, 2004-2012-ci illərdə isə Hacı Zeynalabdin qəsəbəsində 19 nömrəli tam orta məktəbdə təhsil alıb.
Zaur Ələsgərli 2013-2014-cü illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2016-2018-ci illərdə Azərbaycan Hərbi Dəniz Qüvvələrinin, 2018-ci ildən isə Xüsusi Təyinatlı Qüvvələrin sıralarında müddətdən artıq həqiqi hərbi xidmət qulluqçusu olub.
Azərbaycan Ordusunun SAH Xüsusi Təyinatlı Qüvvələrinin giziri olan Zaur Ələsgərli 27.09.2020-ci ildə Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın, Füzulinin, Qubadlının və Xocavəndin azadlığı uğrunda gedən döyüşlərdə savaşıb. Zaur Ələsgərli oktyabrın 31-də Xocavənd döyüşləri zamanı şəhid olub.
Azərbaycan Prezidenti İlham Əliyevin Sərəncamına əsasən Ələsgərli Zaur ölümündən sonra "Qarabağ" ordeni, "Vətən uğrunda", "Cəbrayılın azad olunmasına görə", "Xocavəndin azad olunmasına görə", "Füzulinin azad olunmasına görə" və "Qubadlının azad olunmasına görə" medalları ilə təltif edilib. 
Ruhun şad olsun, Vətənimizin cəsur oğlu!

Müxbir:Vəsiqə DADAŞOVA