Bu gün 27.09.2020-ci il tarixində başlayan Vətən müharibəsi zamanı şəhid olan Azərbaycan Silahlı Qüvvələrinin çavuşu Abdalov Nurlan Faiq oğlunun şəhadətə ucaldığı gündür.
 
Sumqayit.tv xəbər verir ki, şəhidimiz Abdalov Nurlanın anım mərasimi Şəhidlər Xiyabanında məzarını ziyarət edilərək başlayıb, sonra isə xeyir-şər evlərinin birində ehsan süfrəsi verilərək davam edib. Tədbir şəhidlərimizin ruhlarına 1 dəqiqəlik sükutla və Azərbaycan Respublikasının Himni ilə başlayıb, həmçinin vətənpərvər ruhlu şeirlər səsləndirilib və mahnılar ifa olunub. Məclisdə İcra Hakimiyyətinin nümayəndələri, 26 və 14 nömrəli məktəblərin şagird və müəllimləri, İstedad liseyinin şagirdlər və müəllimləri, Corat Cümə məscidinin axundu Hacı Sahib Məmmədov, qohumları və şəhid ailələri iştirak ediblər.

Xatırladaq ki, Abdalov Nurlan Faiq oğlu 12.06.2000-ci ildə Sumqayıt şəhərində anadan olub. 2006-2017-ci illərdə Sumqayıt şəhər 14 nömrəli tam orta məktəbdə təhsil alıb. 2012-2015-i illərdə Sumqayıt şəhər Dostluq Mədəniyyət Mərkəzinin Rəssamlıq kursunu bitirib. 2018-ci ildə həqiqi hərbi xidmətə çağırılmış və 2020-ci ilin yanvar ayında hərbi xidmətdən qayıtmışdır. Hərbi xidmət dövründə vəzifəsi baş sürücü olmuş, ailəsinə 2 dəfə təşəkkür məktubu göndərilmişdir. Müddətdən artıq hərbi xidmət üçün yenidən ordu sıralarına yazılmış və 2020-ci il yay aylarından etibarən müddətdən artıq hərbi xidmətə başlamış və manqa komandiri baş çavuş vəzifəsinə yüksəlmişdir.

Azərbaycan Ordusunun çavuşu olan Nurlan Abdalov 27.09.2020-ci il tarixində Azərbaycan Silahlı Qüvvələri tərəfindən Ermənistana qarşı başlanan əks-hücum əməliyyatlarında iştirak etmiş, 2-ci Qarabağ müharibəsində mərdliklə vuruşmuş, Füzuli, Cəbrayıl, Zəngilan, Xocavənd uğrunda döyüşlərdə iştirak etmişdir. 3 noyabr 2020-i ildə Xocavənd uğrunda gedən qızğın döyüşlərdə şəhidlik məqamına ucalmışdır.
Azərbaycan Prezidenti İlham Əliyevin Sərəncamına əsasən "Xocavəndin azad olunmasına görə",  "Laçının azad olunmasına görə", "Vətən uğrunda"  və "Füzulinin azad olunmasına görə" medalları ilə təltif edilib. 

Ruhun şad olsun, Vətənimizin mərd oğlu!

Müxbir:Vəsiqə DADAŞOVA